1. Preisträger Prosa

Herr Norbert Schneider

Herbschtglick

Herbschtnewwel walljert in de Luft erum. Die Sunn packt’s nit, e Loch in die Wolgedeck se reiße. Ich schaffe im Garde unn siehn driwwe, wie Millersch, die zwää alde Leitcher aus de Nochberschaft, derr Grumbeerkraut uff ääner Haufe rechele.

Beim Alfred unn seiner Fraa, em Lenche, muss alles langsam gieh, wie in Zeitlub. Schloggerich mache se ganz klääne Dribbelschrittcher, manchemol reiwe se ehr Areme unn kräckse e bissi, wann se sich bigge. Awwer lamendeere dut kääns. Es fällt kää äänzich Wort. Se sin ingespeelt seit ewich unn drei Daach. Jedes wääß, wie unn wo mehr anner oogreife muss.

Unnerm Kichefenschder stieht e Planzbäämche. De Alfred will met dem schwere eise Spade e Loch aushewe. Schnell lääf ich dorch dene Grenzpaad unn rufe eniwwer: „Lossen’t nor, ich helfe Eich“. „Jo, was ess mer doch so arem worr, frieer hot mer uff de Hitt met dem schwere Eise geschafft unn heit packt mer kää Spade mie insesteche. Jo, das Alder! Hau mer doch met de Schlaa grad noch dene Stiggel eninn, dass ich das Ab-
belbäämche e bissi feschtbinne kann“, seet de Alfred. „ Derjenich, wo vun uns zwää emol iwwerich bleibt, ess denn nit ganz so allää, wann er dorch das Fenschder dem Bäämche im Garde zugugge kann, wie’s es Johr iwwer blieht unn Äbbel treet.“

Ich siehn, wie es Lenche met e paar Grumbeere, wo’s aus de Glut vun dem Grumbeerfeier gescherrt hot, eninn ins Haus gieht. „Allee“, seet de Alfred, „mer raume do noch es Zeich uff unn dann giehsche met eninn. Hmh… es ganze Johr frei ich mich uff diedoo Zeit met Feiergequellde unn wäächem Kees.“

Wie do grad die Sunn emol ganz korz dorch die Wolge linst, do denk ich bei meer: Vleicht hunn se jo Glick, die zwää, unn dann krien se ab neegschde Herbscht zu dene Gequellde unn dem wääche Kees aach noch e paar Mol gedämbde Äbbel…