Saarländischer Mundartpreis 2022
Mir sinn so. Mir lääwe so. Mir schwätze so.
Lyrik/Kurztext - 1. Preis
"Aus m Himmel hole"
Matthias Zech, Speyer
midde in dere Nacht
wann er nimmie zunemme kann
un noch net abnemme muss
do du ich
langsam zu m nufflange
du n eiwickle in schwarzblooe Samt un
runnerhole ganz dusmo
fer dich
den mollische Mond
un du duscht n leicht
an dei rundie Bruscht leche
rausnemme aus dem wääche Dichelsche
drickscht m en luftiche Kuss uff die Nas
un loscht n widder vorsichtig zurickrolle
uff seim glänzische Silwerrädel
nuff in die Milchstrooß
wu er hell un heller leichte dut
fer all die annere
die wu en ach zum Verschenke
an ihr Liebschdie
aus m Himmel hole wollen
